അവര്‍ അനാഥരായിരുന്നു, പാലും പാല്‍നിലാവും സ്വപ്‌നം കണ്ട്‌ കഴിഞ്ഞിരുന്ന അവര്‍ക്കു നേരെ ഒരു നാള്‍ നക്ഷത്രങ്ങള്‍ കൈ നീട്ടി, താരാട്ടു പാടി, അവരെ ഓമനിച്ചു.
ഓരോ ശിശുരോദനത്തിലും കേള്‍ക്കുന്നത് ഒരു കോടി ഈശ്വരവിലാപമാണെന്ന്‌ കവി പാടിയത്‌ നേരാണെങ്കില്‍ ഈ നക്ഷത്രങ്ങള്‍ ധന്യരാണ്‌. എത്ര ഈശ്വരന്മാരുടെ കണ്ണീരാണ്‌ ഇവരൊപ്പുന്നത്‌.
ലോകമെമ്പാടും എത്ര കുരുന്നുകളാണ്‌ തെരുവീഥികളില്‍ അകപ്പെടുന്നത്‌. ഇവരില്‍ ചിലര്‍ക്ക്‌ ലോകപ്രശസ്‌തരുടെ മക്കളാകാനുളള ഭാഗ്യം ലഭിച്ചു.
കുഞ്ഞുങ്ങളെ ദത്തെടുക്കുന്ന കാര്യത്തില്‍ പ്രധാനമായും പറയേണ്ട പേര്‌ ആന്‍ജലീന ജോളിയുടേതാണ്‌.
പ്രസവിച്ച മൂന്ന്‌ മക്കളോടൊപ്പം ദത്തെടുത്ത മൂന്ന്‌ മക്കളെയും പക്ഷഭേദമില്ലാതെ സ്‌നേഹിക്കുന്ന ആന്‍ജലീനക്ക്‌ ഭര്‍ത്താവ്‌ ബ്രാഡ്‌ പിറ്റിന്‍െറ സ്‌നേഹപൂര്‍ണ്ണമായ പിന്തുണയുണ്ട്‌.
പോപ്‌ ഗായിക മഡോണ മലാവിയില്‍ നിന്ന്‌ ഡേവിഡ്‌ ബാന്‍ഡയെ സ്വന്തമാക്കിയത്‌ ഒട്ടനവധി നിയമയുദ്ധങ്ങള്‍ നടത്തിയാണ്‌. ആന്‍ജലീനയുടെയും ബ്രാഡ്‌ പിറ്റിന്‍െറയും ഉപദേശങ്ങള്‍ ഇക്കാര്യത്തില്‍ മഡോണ സ്വീകരിച്ചിരുന്നു.
മെഗ്‌ റിയാന്‍ ചൈനയില്‍ നിന്ന്‌ ഡെയ്‌സിയെയും ഇവാന്‍ മെഗ്‌ഗ്രിഗോര്‍ ഈവ്‌ ദമ്പതികള്‍ ഒരു മംഗോളിയന്‍ പെണ്‍കുട്ടിയെയും ദത്തെടുത്ത്‌ വാര്‍ത്ത സൃഷ്‌ടിച്ചു.
വലേറി ഹാര്‍പെറും ടോണി കാക്രിയോട്ടിയും നാല്‌ വയസ്‌സുളള കുട്ടിയെ ദത്തെടുത്തിരുന്നു.
സ്‌റ്റീവന്‍ സ്‌പില്‍ ബര്‍ഗും കേറ്റ്‌ ക്യാപ്‌ഷായും അനാഥരായ ഏഴ്‌ കുട്ടികളുടെ രക്ഷിതാക്കളാണ്‌.
ജെയിംസ്‌ കാവിയെണലും ഭാര്യയും ഒരു ചൈനീസ്‌ കുട്ടിയെ ദത്തെടുത്തിരുന്നു.
എമി, ജോന്ന എന്നീ പേരുളള രണ്ട്‌ വിയറ്റനാമി പെണ്‍കുട്ടികള്‍ ബ്ലേക്ക് എഡ്‌വാര്‍ഡിന്‍െറ സുരക്ഷിതത്വത്തില്‍ സന്തുഷ്‌ടരായി കഴിയുന്നു. അമേരിക്കന്‍ നടിയും ഗായികയും ഫാഷന്‍ മോഡലുമായ മിയ ഫാറോ ലോകത്തിന്‍െറ വിവിധ ഭാഗങ്ങളില്‍ നിന്ന്‌ പത്ത്‌ കുട്ടികളെ ദത്തെടുത്തു. അവരില്‍ ചിലര്‍ക്ക്‌ വൈകല്യങ്ങളുമുണ്ട്‌.
പടിഞ്ഞാറന്‍ രാജ്യങ്ങളിലുളളതിലും നിയമക്കുരുക്കാണ്‌ ഇന്ത്യയില്‍ ദത്തെടുക്കലിന്‌. എന്നാല്‍ കുന്തി ഉപേക്ഷിച്ച കര്‍ണ്ണനെ രക്ഷപ്പെടുത്തിയ അതിരഥന്‍െറയും രാധയുടെയും നാട്ടില്‍ , പറയിപെറ്റ പന്ത്രണ്ട്‌ മക്കളില്‍ പത്തു പേര്‍ക്കും അഭയം ലഭിച്ച മണ്ണില്‍ , അനാഥര്‍ക്ക്‌ അഭയം ലഭിക്കാതിരിക്കുമോ?
കാഴ്‌ചയില്‍ തന്നെ പോലെയിരിക്കുന്ന കുട്ടികളെ ദത്തെടുക്കാന്‍ ആഗ്രഹിച്ച സുസ്‌മിതാ സെന്നിന്‌ ലഭിച്ച ഭാഗ്യമാണ്‌ റിനിയും അലീഷയും. 2004ല്‍ വിവാഹിതയാകുന്നതിനു മുമ്പേ പൂജയെയും ഛായയെയും ദത്തെടുത്ത്‌ രവീണാ ടണ്ടന്‍ അമ്മയായി.
ക്രിസ്‌റ്റി ക്രാഫോഡിന്‍െറ മോമ്മി ഡിയറസ്‌റ്റ്‌ എന്ന പുസ്‌തകം പ്രശസ്‌തരുടെ ദത്തുപുത്രര്‍ അനുഭവിക്കേണ്ടി വരുന്ന മാനസികസംഘര്‍ഷത്തെക്കുറിച്ചും വൈകാരിക അരക്ഷിതാവസ്‌ഥയെക്കുറിച്ചും പ്രതിപാദിക്കുന്നു. പ്രശസ്‌ത നടി ജൊവാന്‍ ക്രാഫോഡിന്‍െറ ദത്തുപുത്രിയാണ്‌ നടിയായ ക്രിസ്‌റ്റി. അനാഥമന്ദിരത്തില്‍ ജീവിക്കുകയായിരുന്നു ഭേദമെന്ന്‌ ക്രിസ്‌റ്റി മോമ്മി ഡിയറസ്‌റ്റില്‍ വെളിപ്പെടുത്തിയിരുന്നു.
തെരുവില്‍ വളര്‍ന്ന്‌ പെട്ടെന്നൊരു ദിവസം കോടീശ്വരനായി മാറിയ അനാഥന്‍െറ കഥ പറഞ്ഞ `സ്‌ലം ഡോഗ്‌ മില്ല്യനയറി`ലെ ജമാലിന്‍െറ നിസ്‌സംഗതയാണ്‌ പല താര പുത്രര്‍ക്കും. എങ്കിലും നിസ്‌സഹായതയുടെ പേരില്‍ ഇവരെ ഉപേക്ഷിക്കേണ്ടി വന്ന അമ്മമാര്‍ക്ക്‌ ആശ്വസിക്കാം തങ്ങളുടെ മക്കള്‍ക്ക്‌ ഇരുളില്‍ കാവലായി നക്ഷത്രങ്ങളുണ്ട്‌.
No comments:
Post a Comment