Monday, April 19, 2010

പ്രണയത്തിന്‍െറ മനശ്‌ശാസ്‌ത്രം

നിങ്ങള്‍ക്ക്‌ അനിയന്ത്രിതമായി ഹൃദയമിടിപ്പ്‌ അനുഭവപ്പെടുന്നുണ്ടോ? വിശപ്പും ഉറക്കവും കുറയുന്നുണ്ടോ? ഒരു പ്രത്യേക വ്യക്തിയെ അഭിമുഖീകരിക്കാന്‍ നിങ്ങള്‍ പ്രയാസപ്പെടുന്നുണ്ടോ? എങ്കില്‍ ചിന്തിക്കേണ്ട സമയമായി, നിങ്ങള്‍ പ്രണയത്തിലാണ്‌.....

പ്രണയത്തിന്‍െറ മനശ്‌ശാസ്‌ത്രത്തെക്കുറിച്ച്‌ ഏറെ പഠനങ്ങള്‍ നടന്നിട്ടുണ്ട്‌. അടുത്ത കാലത്ത്‌ നടന്ന ന്യൂറോസയന്‍സ്‌ ഗവേഷണ പ്രകാരം പ്രണയത്തിലകപ്പെടുന്ന വ്യക്തികളുടെ തലച്ചോറില്‍ ചില പ്രത്യേക രാസവസ്‌തുക്കള്‍ പ്രവര്‍ത്തിക്കുന്നുണ്ട്‌. ഫെറോമോണ്‍സ്‌, ഡൊപാമൈന്‍, നോര്‍എപ്പിനെര്‍ഫിന്‍, സെറോടോണിന്‍ എന്നീ രാസവസ്‌തുക്കള്‍ തലച്ചോറിന്‍െറ സന്തോഷത്തിന്‍െറ ആസ്‌ഥാനത്തെ ഉത്തേജിപ്പിക്കുകയും അതു വഴി ശാരീരിക പ്രവര്‍ത്തനങ്ങളില്‍ വ്യതിയാനമുണ്ടാകുകയും ചെയ്യുന്നു. ഉയര്‍ന്ന ഹൃദയമിടിപ്പ്‌, ഉറക്കമില്ലായ്‌മ, വിശപ്പില്ലായ്‌മ, ആഹ്‌ളാദത്തിന്‍െറ ആധിക്യം എന്നിവയാണ്‌ ശാരീരികമായി ഉണ്ടാകുന്ന മാറ്റങ്ങള്‍.

1973ല്‍ ജോണ്‍ ലീ എന്ന വിഖ്യാത മനശ്‌ശാസ്‌ത്രജ്ഞന്‍ `കളേര്‍സ്‌ ഓഫ്‌ ലവ്‌ `എന്ന തന്‍െറ പുസ്‌തകത്തില്‍ പ്രണയം ആറ്‌ വിധത്തിലുണ്ടെന്ന്‌ പറയുന്നു.

1. ഇറോസ്‌ - അനുയോജ്യനായ ഒരു വ്യക്തിയെ പ്രണയിക്കുക.
2. ലുഡൂസ്‌ - പ്രണയത്തെ തമാശയായി കണക്കാക്കുക.
3. സ്‌റ്റോറേജ്‌ - പ്രണയത്തെ സൗഹൃദമായി കരുതുക.
4. മാനിയ - ഭ്രാന്തമായ പ്രണയം.
5. പ്രാഗ്‌മ - പ്രായോഗികമായ പ്രണയം.
6. അജേപ്‌ - നിസ്‌സ്വാര്‍ത്ഥമായ പ്രണയം.

റോബര്‍ട്ട്‌ സ്‌റ്റേന്‍ബെര്‍ഗിന്‍െറ `ട്രൈയാംഗുലര്‍ തിയറി ഓഫ്‌ ലവി`ല്‍ പ്രണയത്തിന്‍െറ മൂന്ന്‌ വ്യത്യസ്‌ത മുഖങ്ങളെക്കുറിച്ച്‌ അദ്ദേഹം പ്രതിപാദിക്കുന്നു.

1. ഇന്‍റിമെസി (വൈകാരികമായ അടുപ്പം) - ഇത്തരം അടുപ്പത്തില്‍ വ്യക്തിപരമായ രഹസ്യങ്ങള്‍ പങ്കുവയ്‌ക്കും. ഗാഢമായ സൗഹൃദത്തിലും പ്രണയത്തിലുമാണ്‌ ഈ അടുപ്പം കാണുന്നത്‌.

2. പാഷന്‍ (അഭിനിവേശം) - ഇത്‌ പലപ്പോഴും ശാരീരികാകര്‍ഷണത്തെ അടിസ്‌ഥാനപ്പെടുത്തിയായിരിക്കും.

3. കമ്മിറ്റ്‌മെന്‍റ്‌ (പ്രതിബദ്ധത) - പല ബന്ധങ്ങളുടെയും ഏറ്റവും മുഖ്യമായ ഘടകമാണിത്‌. ദാമ്പത്യജീവിതത്തെ മുന്നോട്ട്‌ നയിക്കുന്നത്‌ ഈ വികാരമാണ്‌.

അവനവനോട്‌ തോന്നുന്ന അമിതമായ പ്രണയത്തെ `നാര്‍സിസം` എന്ന്‌ മനശ്‌ശാസ്‌ത്രം അനുമാനിക്കുന്നു. തന്‍െറ പ്രതിച്ഛായയെ പ്രണയിച്ച്‌ ജീവന്‍ വെടിഞ്ഞ ഗ്രീക്ക്‌ കഥയിലെ നായകനായ നാര്‍സിസ്‌ രാജകുമാരന്‍െറ ഓര്‍മ്മയ്‌ക്കാണ്‌ ഈ പേര്‌ നല്‍കിയത്‌.

ആത്‌മാര്‍ത്ഥമായ പ്രണയം നിങ്ങളുടെ ആരോഗ്യത്തെ അനുകൂലമായി ബാധിക്കും. നിങ്ങള്‍ക്ക്‌ ഉയര്‍ന്ന ലക്ഷ്യങ്ങളുണ്ടാകുകയും അതിനു വേണ്ടി പ്രവര്‍ത്തിക്കാന്‍ മനസ്‌സ്‌ സജ്ജമാകുകയും ചെയ്യും.

No comments:

Post a Comment