പത്തൊന്‍പതാം നൂറ്റാണ്ടിലെ ഫ്രഞ്ച്‌ ന്യൂറോളജിസ്‌റ്റും അനാട്ടമി പത്തോളജി പ്രൊഫസറുമായ ജീന്‍ മാര്‍ട്ടിന്‍ ചാര്‍ക്കോട്ടിന്‌ രണ്ട്‌ ശിഷ്യന്മാരുണ്ടായിരുന്നു, ജോസഫ്‌ ബ്രുയറും സിഗ്‌മണ്ട്‌ ഫ്രോയിഡും. അന്ന ഒ എന്ന 21കാരിയെ ബ്രുയര്‍ ഹിസ്‌റ്റീരിയ രോഗത്തിന് ചികിത്സിച്ചിരുന്നു. ബുദ്ധിശാലിയായ അന്നയ്‌ക്ക്‌ വിറയലും ഓര്‍മക്കുറവുമുണ്ടായിരുന്നു. ഇപ്പോള്‍ ഇത്‌ കണ്‍വര്‍ഷന്‍ ഡിസോര്‍ഡര്‍ (മാനസികസമ്മര്‍ദ്ദം ശാരീരികപ്രശ്‌നങ്ങള്‍ക്ക്‌ കാരണമാകുക) എന്നാണ്‌ അറിയപ്പെടുന്നത്‌.
യാദൃച്ഛികമായി ബ്രുയര്‍ ഇല്ലാത്ത ഒരു ദിവസം ഫ്രോയിഡ്‌ അന്നയോട്‌ സംസാരിച്ചിരുന്നു. കുറച്ച്‌ സമയത്തിനു ശേഷം അന്നയുടെ വിറയല്‍ ശമിച്ചു. അന്ന അത്‌ഭുതത്തോടെ പറഞ്ഞു, `ടോക്കിംഗ്‌ ക്യുര്‍`(സംസാരിച്ച്‌ സുഖപ്പെടുത്തുക). വികാരങ്ങളെ പുറത്തുവിടുന്ന ഈ രീതിയെ ഫ്രോയിഡ്‌ ഫ്രീ അസോസിയേഷന്‍ എന്ന്‌ വിളിച്ചു. മനശ്‌ശാസ്‌ത്രത്തിലെ പ്രധാനപ്പെട്ട ചികിത്സാരീതിയായ സൈക്കോഅനാലിസസിന്‍െറ ഉദ്‌ഭവം അങ്ങനെയാണ്‌.
വികാരങ്ങളെ ഉളളിലടക്കിവയ്‌ക്കുന്നത്‌ അപകടകരമായ പ്രവണതയാണ്‌. പലപ്പോഴും ഇത്‌ നിമിത്തം ഉയര്‍ന്ന മാനസികസമ്മര്‍ദ്ദമുണ്ടാകുകയും ഇത്‌ ശാരീരികപ്രശ്‌നങ്ങള്‍ക്ക്‌ കാരണമാകുകയും ചെയ്യുന്നു. പലരും മാനസികസംഘര്‍ഷങ്ങളില്‍ നിന്ന്‌ രക്ഷ നേടാന്‍ മരുന്നുകളെ ആശ്രയിക്കാറുണ്ട്‌. എന്നാല്‍ ഏറ്റവും ഉത്തമമായ മാര്‍ഗ്‌ഗം ഫ്രീ അസോസിയേഷനാണ്‌. ഈ ചികിത്സാരീതിയില്‍ ചികിത്സകന്‍ രോഗിയോട്‌ വെറുതെ സംസാരിക്കുന്നു. പലപ്പോഴും ഇത്തരം ആശയവിനിമയങ്ങളില്‍ പ്രത്യേക വിഷയമുണ്ടായിരിക്കില്ല. ക്രമേണ രോഗിയുടെ മനസ്‌സിലെ സംഘര്‍ഷങ്ങള്‍ അവസാനിക്കുന്നു.
വികാരങ്ങള്‍ പ്രകടിപ്പിക്കമ്പോഴും പങ്കുവയ്‌ക്കുമ്പോഴും മാനസികസംഘര്‍ഷങ്ങള്‍ക്ക്‌ അയവ്‌ ലഭിക്കും. ഇതു വഴി മാനസികാരോഗ്യം ഉറപ്പാക്കാം.
No comments:
Post a Comment